Kirkjugarða Reykjavíkur bjóða upp á fjölbreytta þjónustu varðandi umhirðu leiða, svo sem hreinsun beða, tyrfingu, sumarblómaþjónustu og annan frágang samkvæmt gildandi verðskrá. Ný leiði eru að jafnaði tyrfð um ári eftir grafartöku en einnig er hægt að óska eftir tyrfingu fyrr. Mikilvægt er þó að minnsta kosti einn vetur hafi liðið frá jarðsetningu svo jarðvegur hafi náð að síga. Kirkjugarðarnir eru slegnir reglulega og starfsfólk sér um almennt viðhald garðanna.

Vatnspóstar, vökvunarkönnur og flokkunarstöðvar eru víða um kirkjugarðana til afnota fyrir gesti. Við biðjum gesti um að virða flokkun úrgangs og ganga vel um garðana.

Óheimilt er að planta trjákenndum plöntum eða fjölæringum sem dreifa sér með rótum eða sá sér.

Ef blómabeð eru á leiðum er æskilegt að þau komi í beinu framhaldi af legsteini og nái ekki lengra fram en 60 cm. Mælt er með notkun blómakera fremur en blómabeða.

Óheimilt er að afmarka leiði eða blómabeð með grjóti, hellum, timbri eða öðrum sambærilegum efnum. Þar sem blómarammar eru heimilir skulu þeir vera úr granít og gerðir samkvæmt reglum kirkjugarðanna.

Mælst er til þess að legsteinar séu ekki settir á kistuleiði fyrr en ári eftir jarðsetningu. Einnig er mælst til þess að steinar séu ekki settir upp á tímabilinu frá nóvember og út mars. Um stærð og frágang minnismerkja í umdæmi Kirkjugarða Reykjavíkur gilda sérstakar reglur og sækja þarf um leyfi fyrir uppsetningu þeirra.

Viðhald og viðgerðir minnismerkja eru á ábyrgð aðstandenda. Kirkjugarðar Reykjavíkur bjóða upp á að rétta legsteina gegn gjaldi og jafnframt ýmsa þjónustu við þrif, viðhald og viðgerðir minnismerkja í samstarfi við sérhæfða verktaka. Einnig bjóða ýmsir verktakar upp á þjónustu í görðunum.

Kirkjugarðar Reykjavíkur starfa eftir lögum um kirkjugarða, greftrun og líkbrennslu nr. 36/1993 og reglugerð nr. 668/2007 um kistur, duftker, greftrun og líkbrennslu.

Kirkjugarðar eru friðhelgir samkvæmt lögum. Starfsfólk og stjórn Kirkjugarða Reykjavíkur mælist til þess að umgengni um kirkjugarðana endurspegli kyrrð og kærleika en nánar má sjá reglur fyrir Kirkjugarða Reykjavíkur hér: Reglur fyrir Kirkjugarða Reykjavíkur 533/2026

Við andlát er að mörgu að huga og kjósa flestir að leita til útfararþjónustu varðandi ráðleggingar um næstu skref. Útfararþjónustur leiða aðstandendur í gegnum ferlið við andlát og aðstoða við undirbúning og skipulag útfarar. Hægt er að senda inn ósk um skipulag útfarar hér.

Útför getur verið tvenns konar, annars vegar jarðarför þar sem kista er borin til grafar og jarðsett í kirkjugarði og hins vegar bálför þar sem kistan er brennd og aska hins látna jarðsett í sérstökum duftkerjum. Duftker eru svo jarðsett í sérstökum duftreit í kirkjugarði eða ofan á kistu með leyfi tengilið  leiðis. Hér má finna bækling um duftgarða – Duftgardar_KirkjugardaRVK. Einnig er leyfilegt að dreifa ösku látinna að fengnu leyfi frá sýslumanni. Allir sem eru sjálfráða og hafa ákveðið bálför að lífi loknu geta skrifað undir yfirlýsingu um bálför hér.

Fólk í öllum trúfélögum og utan þeirra á lögvarinn rétt á legstað í þeirri sókn sem það andaðist eða var síðast heimilisfast eða þar sem aðstandendur óska legstaðar. Kjósi aðstandendur að leita til útfararþjónustu sjá þær um samskipti við Kirkjugarða Reykjavíkur varðandi úthlutun á leiðum og að taka frá leiði við hlið hins látna sé þess óskað.

Útfararþjónustur selja krossa á leiði.